Tala Fa'asolopito o le Ekalesia Fa'apotopotoga a le Atua i Samoa (Assemblies of God, AOG) i Amerika Samoa

Upu Tomua

O lenei tusi sa mafua lona tusiaina ona o se manatu o le a mou atu tala fa’asolopito e fa’amatalaina ai le amataga mai o le Fa’apotopotoga a le Atua i Amerika Samoa (Assemblies of God -AOG) ae le’i tusitusia ma fa’amaumauina lelei. Ona o tuaa o lenei aiga (Rev. Siaosi Mageo, Malaea Brown Lutu Mageo, ma Meanoa Brown) o nisi sa tutū malosi mai i le amataga mai o lenei tapuaiga, ua manatu ai le fanau ina ia fa’amaumau loa nei tala ina ia iai ni tala tusitusia mo fa’amaumauga i le amataga mai o lenei ekelesia i Amerika Samoa, a’o lei mou atu i latou e iloaina lelei nei tala fa’asolopito. O le nu’u lava o Pago Pago sa amataina ai le Fa’apotopotoga a le Atua (AOG) i Amerika Samoa, o le mea fo’i lea ua tu’uina ai le ata o le malumalu AOG i Pago Pago i le fa’ava’a o lenei tusi. E tatau lava ona iloa lelei tagata sa amataina lenei tapuaiga, ma i latou uma sa togi se ma’a i le amataga, aua o nisi o nei tagata, e le iloa lava e tagata e fou mai i lenei tapuaiga. O nisi o tagata lotu ma faifeau o le AOG e pei o Siaosi Mageo ma Poe Makisi, e matua iloa lelei e le tele o tagata ona o lo la tautua malosi mo lenei tapuaiga, ae e le iloa isi tagata na asa maia le vao fitā i aso tau amata mai o lenei lotu.  E matua aoga tele tala-fa’asolopito; o le mea lea e a’oa’oina ai le mataupu o le History i so’o se aoga, kolisi ma univesitē, ma fa’aalu e so’o se malo o le lalolagi le tele o tupe i fale ia e ta’ua o fale-mataaga (museum) [Esera 6:2. Ona maua lea i Akemeta i le ‘olo i le itu malo o Metai le tusi taai, ua faapea foi ona tusia i ona totonu le upu e fa’amanatu a’i]
 Ona o le laiti o le au tusitala, o le a matauina e le aufaitau ni fa’amatalaga malie e pei o tala a tamaiti ma ni fa’aupuga malie i le fa’alogo, ina ia mataala ma fa’afiafiaina ai le aufaitau.